Y glaw yn dod â gêm Morgannwg i ben yn erbyn Sir Nottingham

Image copyright Getty Images

Image caption Roedd Alex Hales chwech yn brin o gyrraedd y 100 i'r tîm cartref

Oherwydd y glaw bu'n rhaid atal gêm olaf Morgannwg yng Nghystadleuaeth 40 pelawd nos Lun yn erbyn Sir Nottingham yn Trent Bridge.

Rhannodd y ddau dîm y pwyntiau wrth i'r gêm ddod i ben heb ganlyniad.

Roedd y tîm cartref wedi sgorio 264 am 6 mewn 40 pelawd.

O chwe rhediad methodd Alex Hales a chyrraedd y 100 ar ôl taro saith pedwar a thri chwech.

Gyda Neil Edwards, cafodd y ddau 114 ar y wiced gyntaf.

Ildiodd James Harris, a fydd efallai yn gadael Morgannwg i ymuno â Sir Nottingham, 60 o wyth pelawd a methu dau ddaliad.

Fe wnaeth y glaw ohirio cychwyn Morgannwg i fatio ac fe osodwyd targed o 257 o 38 pelawd.

Ond daeth mwy o law a bu'n rhaid i'r ymwelwyr roi'r gorau i'r gêm ar 20-0.