Rheini yn colli brwydr i achub ysgol uwchradd

Image copyright (C) British Broadcasting Corporation

Image caption Y bwriad yw cau Ysgol Pantycelyn a sefydlu ysgol newydd yn Ffairfach

Mae Gweinidog Addysg Cymru Leighton Andrews wedi cymeradwyo cau ysgol uwchradd wledig yn sir Gaerfyrddin.

Roedd rhai o rieni Ysgol Pantycelyn a chyngor tref Llanymddyfri wedi gwrthwynebu'r bwriad.

Mae'r cyngor am uno Ysgol Pantycelyn gydag Ysgol Tregîb, Llandeilo, a chodi ysgol newydd yn Ffairfach, ger Llandeilo.

Roedd nifer o rieni yn anhapus gyda'r lleoliad newydd, safle sy'n 15 milltir o Lanymddyfri.

Methiant fu ymdrechion grŵp ymgyrchu i fynd i gyfraith yn erbyn y sir.

Ymateb

Mae'r cyngor wedi sicrhau cyllideb o £23.7 miliwn oddi wrth Lywodraeth Cymru i godi ysgol newydd.

Dywedodd arweinydd Cyngor Sir Gaerfyrddin, Kevin Madge: "Rydym yn falch o benderfyniad y Gweinidog, ac yn edrych ymlaen at ddarparu'r buddsoddiad sylweddol yma mewn addysg yn ardal Dinefwr.

"Bydd y newidiadau yn gwella adnoddau a chyfleoedd, yn enwedig mewn addysg alwedigaethol a dwyieithog, i blant rhwng 14 ac 19 oed."