Caerdydd 3-0 Blackpool

Matthew Connolly yn penio am ei ail gôl

Caerdydd 3-0 Blackpool

Mae record cant y cant Caerdydd adref yn Stadiwm Dinas Caerdydd yn parhau gyda buddugoliaeth yn erbyn Blackpool o 3-0.

Wythnos ar ôl y siom a'r sioc o golli yn Crystal Palace roedd 'na well hwyliau ar y cefnogwyr a'r chwaraewyr.

Fe wnaeth yr Adar Glas ennill yn erbyn tîm arall sy'n anelu am ddyrchafiad ar ddiwedd y tymor a hynny yn gyfforddus.

Sgoriodd Matthew Connolly ei gôl gyntaf dros Gaerdydd, a'i gyntaf dros unrhyw dîm mewn dwy flynedd a hanner, wedi 17 munud.

Wedi i Craig Bellamy greu'r cyfle, croesiad o'r ochr chwith, fe wnaeth Connolly ergydio efo'i droed dde.

O gic rydd fe wnaeth prif sgoriwr Caerdydd, Peter Whittingham, ddyblu mantais y tîm cartref.

Roedd hi'n chwip o gôl wedi 26 munud a chweched gôl Whittingham o'r tymor, yn syth i gefn y rhwyd.

Roedd ei berfformiad unigol yn ystod y gêm yn wych hefyd.

Llwyddiant

Deuddeg munud wedi'r ail hanner fe wnaeth Connolly sicrhau'r fuddugoliaeth gyda'i ail gôl.

Peniad yn ymyl y postyn pella' o gic gornel.

Un cyfle gafodd yr ymwelwyr i ddod yn agos at sgorio.

Cic rydd gan Matt Phillips wnaeth daro'r postyn.

Doedd prif sgoriwr Blackpool, Tom Ince, ddim ar gael oherwydd anaf.

Llwyddodd y tîm cartref i efelychu record wych tîm Caerdydd yn 1959.

Dyma'r tro cyntaf ers hynny i'r Adar Glas ennill eu pedair gêm gynghrair gyntaf gartref mewn tymor.

Mae hyn yn hwb mawr i ymdrech Caerdydd i sicrhau dyrchafiad gan fod y tîm wedi codi i'r brif adran ar ddiwedd tymor 1959-60.