Adeiladwr yn euog o ddynladdiad Meg Burgess
Image copyright
Other
Mae adeiladwr wedi ei gael yn euog o ddynladdiad wedi i ferch dair oed farw ar ôl i wal bum troedfedd o uchder ddisgyn arni.
Roedd George Collier, o Fae Cinmel, wedi gwadu'r cyhuddiad yn Llys y Goron Yr Wyddgrug.
Cafodd ei ddedfrydu i ddwy flynedd o garchar.
Clywodd y llys fod Collier yn gweithio ar beiriant i lefelu tir ar y safle a'i fod wedi stopio gweithio i adael Meg Burgess, ei brawd, Wilson, a'i mam, Lindsay, drwyddo wrth iddynt gerdded i siopa ar Orffennaf 26 2008.
Ond wrth iddyn nhw ddychwelyd o'r siopau gan gerdded ar hyd y palmant gerllaw bwthyn yng Ngallt Melyd, fe ddisgynnodd y wal bum troedfedd, oedd newydd gael ei chodi, ar ben Meg.
Ceisiodd ei mam ac adeiladwyr dynnu'r brics a'r pridd oddi arni ond cadarnhawyd ei bod wedi marw 10 munud ar ôl iddi gyrraedd Ysbyty Glan Clwyd, Bodelwyddan.
Ni chafodd y cwmni Parcol Developments, yr oedd Collier yn gyfarwyddwr arno, gosb ar wahân.