Dyn yn euog o lofruddiaeth 'greulon' ym Mhentyrch

  • 15 Hydref 2012
Bleddyn King Image copyright other
Image caption Cafwyd King yn euog o lofruddiaeth yn dilyn achos llys wnaeth para 10 niwrnod.

Mae dyn 18 oed wedi ei gael yn euog o lofruddio dyn yn ei gartref ym Mhentyrch yn dilyn lladrad.

Clywodd Llys y Goron Caerdydd fod Bleddyn King, o Abercynon, ger Pontypridd, wedi cynllunio i ddwyn o dŷ David Evans, 63 oed, ond bod ymosodiad King ar ei ddioddefwr mor ffyrnig nes i lafn ei gyllell blygu.

Trywanodd King gath Mr Evans i farwolaeth hefyd cyn rhoi'r tŷ ar dân a dianc.

Ond cafodd King ei stopio gan yr heddlu wrth iddo yrru car Citroen Mr Evans ym mis Ionawr eleni.

'Creulon a dideimlad'

Darganfu'r heddlu ddau gerdyn banc oedd yn berchen i Mr Evans pan gafodd King ei archwilio.

Dywedodd Swyddog y Ddalfa'r Heddlu, Ivor Whatmore wrth y llys: "Roedd gwaed dros wyneb King yn ogystal â'i ddillad a rhwng bysedd ei draed."

Dywedodd yr erlynydd, Michael Mather-Lees: "Cynllwynodd King i dargedi Mr Evans mewn modd creulon a dideimlad er lles ei hun."

Cafwyd King yn euog o lofruddiaeth yn dilyn achos llys wnaeth para 10 niwrnod.

Bydd yn cael ei ddedfrydu Ddydd Mawrth.