BBC Cymru Fyw

Golwg ffres ar dirlun yn Oriel y Parc

Published
image copyrightClare Woods
image captionBydd gwaith yr arlunydd Clare Woods yn rhan o'r arddangosfa

Mae gwastraff llechi wedi'i drefnu'n artistig, sbwriel wedi'i adael ym mhrydferthwch cefn gwlad, coed crin a chôr y wig mewn arddangosfa yn Oriel a Chanolfan Ymwelwyr y Parc yn Nhŷ Ddewi.

Yn Oriel y Parc, Canolfan Ymwelwyr Parc Cenedlaethol Arfordir Penfro, mae gwaith newydd yn cynrychioli tirwedd Cymru yn arddangosfa Tir Newydd Celf Tirlun yng Nghymru er 1970.

Y nod yw cyflwyno rhai o'r ffyrdd y mae artistiaid wedi symud i ffwrdd oddi wrth ddarluniau traddodiadol o dirlun Cymru.

'Llechi dramatig'

Dywedodd Curadur Prosiectau Partneriaeth Amgueddfa Cymru Bryony Dawkes: "Rydym ni'n gobeithio y bydd ymwelwyr yn gwerthfawrogi ac yn ymgysylltu â'r ystod eang o gyfryngau, paentio, cerflunio, ffotograffau a ffilm.

"Mae'r arddangosfa'n cynnwys detholiad o artistiaid rhyngwladol, gan gynnwys Brendan Stuart Burns, y mae ei baentiadau wedi eu hysbrydoli gan Fae Caer-fai, gwaith llechi dramatig Richard Long, Cylch Blaenau Ffestiniog a Hill of Hurdles gan Clare Woods, golygfa o'r nos a grëwyd ag olew ac enamel ar alwminiwm."

Mae artistiaid eraill yn cynnwys Keith Arnatt, David Cushway, Mike Perry, Terry Setch, Anthony Shapland a David Nash, sydd, ochr yn ochr â Richard Long yn un o ymarferwyr mwyaf arwyddocaol y DU ym maes Celf Tir, ac y mae ei waith i'w weld mewn casgliadau ar draws y byd.

I helpu ymwelwyr ag Oriel y Parc werthfawrogi'r arddangosfa, bydd Bryony yn arwain dwy daith dywys un dydd Iau bob mis, gan ddechrau ar Hydref 25.

Cynhelir y teithiau tywys am 11am a 2pm yn Oriel y Parc ar Dachwedd 22, Rhagfyr 20, Ionawr 17 a Chwefror 14.

Straeon perthnasol

  • Oriel yn agor: Ymweliad brenhinol