Dynes 23 oed wedi marw ar ôl gwrthdrawiad rhwng dau gar yn Sir Gâr

Cafodd y gwasanaethau brys eu galw i leoliad y ddamwain tua 11pm nos Wener

Mae dynes 23 oed wedi marw ar ôl gwrthdrawiad ffordd rhwng dau gerbyd yn Sir Gaerfyrddin.

Roedd y ddynes yn gyrru un o'r ddau gar a fu yn y ddamwain ar yr A40 rhwng Sanclêr a Hendy-gwyn ar Daf.

Digwyddodd y gwrthdrawiad tua 11pm nos Wener.

Aed a phedwar o bobl, gan gynnwys dau o blant, oedd yn teithio yn y car arall i Ysbyty Gorllewin Cymru yng Nghaerfyrddin.

Credir nad ydi eu hanafiadau yn rhai difrifol.

Roedd y ddynes a fu farw yn byw yn lleol ac mae ei theulu wedi cael gwybod.

Roedd hi'n teithio ar ei phen ei hun ar y pryd.

Mae'r heddlu yn apelio am dystion i gysylltu gydag Uned Plismona Ffyrdd Sir Gaerfyrddin ar 101.