Ail berson wedi marw ar ôl gwrthdrawiad ger Clydach ym Mlaenau Gwent

Cafodd dau o bobl eu lladd wedi'r ddamwain ar Ffordd Blaenau'r Cymoedd

Mae ail berson wedi marw ar ôl gwrthdrawiad rhwng car a dau feic modur ym Mlaenau Gwent ddydd Sadwrn.

Fe wnaeth Heddlu Gwent gadarnhau ddydd Sul bod gyrrwr y car Peugeot wedi marw yn yr ysbyty.

Digwyddodd y gwrthdrawiad tua 12.35pm ddydd Sadwrn ar yr A465, Ffordd Blaenau'r Cymoedd ar gyrion pentre Clydach.

Bu farw gyrrwr un beic modur yn y fan a'r lle.

Roedd gyrrwr y car wedi cael ei gludo mewn ambiwlans awyr i Ysbyty Athrofaol Cymru yng Nghaerdydd.

Anafiadau

Roedd y car Peugeot 106 yn teithio i gyfeiriad Brynmawr a'r beic modur Yamaha a beic modur Brutale yn teithio i gyfeiriad Y Fenni.

Bu'r ffordd ar gau am rai oriau wedi'r digwyddiad.

Mae gyrrwr y beic modur arall yn dal mewn cyflwr difrifol yn Ysbyty Nevill Hall yn Y Fenni.

Cafodd teithiwr yn y car fan anafiadau.

Mae Heddlu Gwent yn apelio am unrhyw dystion i gysylltu gyda nhw ar 101.