Dewis Knoyle yn lle Phillips
Image copyright
Huw Evans picture agency
Mae hyfforddwr dros dro Cymru, Rob Howley, wedi gadael Mike Phillips allan o'r tîm yn erbyn Ariannin ddydd Sadwrn yng Nghaerdydd a dewis Tavis Knoyle yn ei le.
Bydd prop pen-tynn y Gweilch, Aaron Jarvis, yn ennill ei gap cyntaf am fod Adam Jones wedi ei anafu.
Yn y rheng ôl mae Josh Turnbull yn y tîm oherwydd anafiadau Ryan Jones a Dan Lydiate.
Scott Williams fydd yn y canol oherwydd anaf Jonathan Davies.
Bydd Phillips, sydd wedi ennill 68 cap ac wedi bod ar daith y Llewod i Dde Affrica, ar y fainc.
Dywedodd Howley: "Mae cwpwl o anafiadau wedi ein gorfodi i wneud newidiadau ond mae'r ffaith ein bod yn gallu enwi tîm gyda chymaint o brofiad o'r Gamp Lawn yn dangos y cryfder sydd wedi datblygu yn y garfan dros y blynyddoedd diweddar.
"Yn amlwg, mae cyfleoedd i bobl fel Aaron, Tavis a Josh i wisgo crys Cymru yn erbyn Ariannin a cheisio cadw'r crys wedi hynny.
"Rydym yn gwybod pa mor bwysig fydd cael dechrau da yn erbyn Ariannin wrth edrych ymlaen i gyfres yr hydref. Maen nhw'n cyrraedd ar ddiwedd cyfres galed yn erbyn timau Hemisffer y De."
Y newyddion da i Gymru yw bod Jamie Roberts yn dychwelyd i'r tîm ynghyd â Toby Faletau ac Ian Evans.
CYMRU v. ARIANNIN: ddydd Sadwrn, Tachwedd 9; Stadiwm y Mileniwm, Caerdydd.
15-Leigh Halfpenny (Gleision); 14-Alex Cuthbert (Gleision), 13-Scott Williams (Scarlets), 12-Jamie Roberts (Gleision), 11-George North (Scarlets); 10-Rhys Priestland (Scarlets), 9-Tavis Knoyle (Scarlets); 1-Gethin Jenkins (Toulon), 2-Matthew Rees (Scarlets), 3-Aaron Jarvis (Gweilch), 4-Alun Wyn Jones (Gweilch), 5-Ian Evans (Gweilch), 6-Josh Turnbull (Scarlets), 8-Toby Faletau (Dreigiau), 7-Sam Warburton (Gleision, capten).
Eilyddion: Richard Hibbard (Gweilch), Ryan Bevington (Gweilch), Paul James (Caerfaddon), Robin McCusker (Scarlets), Justin Tipuric (Gweilch), Mike Phillips (Bayonne), James Hook (Perpignan), Liam Williams (Scarlets).