Pwll nofio Treherbert yn cael ei ddymchwel
Ar ôl ymgyrch hir, mae pwll nofio Treherbert yn rhan uchaf Cwm Rhondda wedi ei ddymchwel.
Mae Cyngor Rhondda Cynon Taf wedi cael eu cyhuddo o wneud hynny heb ymgynghori gyda phobl yr ardal, gan arwain at bryder am yr effaith ar iechyd pobl gan fod y pwll nofio agosaf bron i bum milltir i ffwrdd yn Ystrad.
Mewn ymateb dywedodd Cyngor Rhondda Cynon Taf bod adeilad y pwll wedi dirywio'n arw ers iddo gau dair blynedd yn ôl.
Roedden nhw'n dweud bod rhaid dymchwel yr adeilad am resymau ariannol a chymdeithasol.
Ond maen nhw'n dweud y bydd y tir ar gael i bobl y pentref ar gyfer unrhyw ddatblygiad yn y dyfodol.
Gwrthod gwahoddiad
Agorwyd y pwll yn 1936. Ers iddo gau mae pobl leol wedi bod yn ymgyrchu i'w ail agor.
Dywedodd Geraint Davies, un o gynghorwyr Treherbert, bod y cyngor wedi cyhoeddi ar Hydref 22 y byddai'r pwll yn cael ei ddymchwel.
"Fe wnaed hynny heb ymgynghori gyda'r trigolion lleol.
"Wnaeth neb o'r cyngor ddod i'n pwyllgorau a chyfarfodydd cyhoeddus.
"Rydan ni wedi eu gwahodd nhw, ond maen nhw wedi gwrthod."