Carchar am achos marwolaeth dyn 22 oed o Ynys Môn

Roedd Tomos Wyn Roberts wedi bod allan ym Mangor cyn cael ei ladd

Yn Llys y Goron Caernarfon cafodd dau yrrwr eu hanfon i garchar am achosi marwolaeth dyn yn Llangefni.

Cafodd Daniel Owen, 22 oed, yn wreiddiol o Tŷ Croes, ei anfon i garchar am chwe mlynedd ac wyth mis, a charcharwyd Jamie Wyn Wililams 19 oed o Fangor am bum mlynedd.

Ddoe penderfynodd rheithgor fod Williams yn euog o achosi marwolaeth Tomos Wyn Roberts, 22 oed o Langefni, drwy yrru'n beryglus.

Roedd Owen eisoes wedi pledio'n euog i gyhuddiad tebyg.

Taflu i'r awyr

Cafodd Mr Roberts ei daro gan gar wrth gerdded ar hyd yr A5114 yn Llangefni yn Nhachwedd y llynedd.

Dywedodd y barnwr Niclas Parry fod yr achos yn dangos peryglon rasio.

Clywodd y llys fod y ddau yrwr wedi bod yn herio ei gilydd ar hyd strydoedd Llangefni cyn y ddamwain.

Cafodd Mr Thomas ei daro cyn cael ei daflu i'r awyr gan gar Vauxhall Corsa arian oedd yn cael ei yrru gan Owen.

Clywodd y rheithgor fod y gyrrwr tacsi wedi gweld y car arall, car Vauxhall Corsa coch yn cael ei yrru gan Williams, yn cael ei yrru o dan y corff tra oedd yn yr awyr.

Glaniodd corff Mr Roberts ganllath o'r tacsi ac roedd yn gwaedu'n drwm.

Bu farw yn y fan a'r lle.

Stopiodd y ddau gar cyn i'r gyrwyr gamu allan ond fe yrrodd Williams i ffwrdd yn gyflym i gyfeiriad Caergybi.