Gweilch 17-6 Toulouse

Seren y gêm, Eli Walker, yn camu heibio Yoann Huget o Toulouse i sgorio'r cais allweddol.

Gweilch 17-6 Toulouse

Cafodd y Gweilch fuddugoliaeth haeddiannol yn erbyn Toulouse yng Nghwpan Heineken yn Stadiwm Liberty ddydd Sadwrn, gan ddial am y golled o 30-14 yn ne Ffrainc wythnos yn ôl.

Cais gwych gan seren y gêm Eli Walker oedd yn allweddol, gan ailgynnau eu gobeithion o gyrraedd rownd yr wyth olaf.

Carlamodd Walker hebio i dri amddiffynnydd i gyrraedd y gornel chwith.

Roedd Toulouse, sydd wedi bod yn bencampwyr Ewrop bedair gwaith, yn edrych yn rhyfeddol o ddifflach, ond fe wnaeth Jean Marc Doussain eu cadw yn y gêm gyda chic gosb a chic adlam.

Disgyblaeth

Ond manteisiodd y maswr Dan Biggar ar ddiffyg disgyblaeth yr ymwelwyr trwy gicio 12 pwynt.

Cafodd y clo Patricio Albacete a chapten y Ffrancod Jean Bouilhou ill dau gerdyn melyn am ddiffyg disgyblaeth.

Roedd symudiad olaf y gêm yn symbolaidd o berfformiad Toulouse - wrth iddyn nhw wrthymosod ar y dde, gyda dyn yn sbâr a'r llinell gais yn gwahodd, aeth y bas olaf heibio'r dyn ac i mewn i'r ystlys.

Roedd 'na hwb i'r Gweilch a thîm Cymru wrth i'r prop Adam Jones ddod oddi ar y fainc yn gynnar yn yr ail hanner.

Mae Jones, sydd wedi ennill 83 cap dros Gymru, wedi llwyr wella o'r anaf i'w ben-glin a gafodd wrth i'r Gweilch golli o 39-22 yn erbyn Caerlŷr ym mis Hydref.

Timau

Gweilch: Richard Fussell; Ross Jones, Andrew Bishop, Ashley Beck, Eli Walker; Dan Biggar, Kahn Fotouali'i (capt); Ryan Bevington, Richard Hibbard, Campbell Johnstone, Ian Gough, James King, Ryan Jones, Justin Tipuric, Joe Bearman.

Eilyddion: Scott Baldwin, Duncan Jones, Adam Jones, Lloyd Peers, George Stowers, Rhys Webb, Matthew Morgan, Tom Isaacs.

Toulouse: Maxime Medard; Vincent Clerc, Yann David, Gael Fickou, Yoann Huget; Jean Marc Doussain, Luke Burgess; Vasil Kakovin, Gary Botha, Census Johnston, Yoann Maestri, Patricio Albacete, Jean Bouilhou (capt), Thierry Dusautoir, Louis Picamoles.

Eilyddion: Christopher Tolofua, Jean-Baptiste Poux, Yohann Montes, Romain Millo-Chluski, Yannick Nyanga, Gregory Lamboley, Yannick Jauzion, Sebastien Bezy.

Dyfarnwr: George Clancy (Iwerddon)

Caerwysg 30-20 Scarlets

Caerwysg (20) 30

Ceisiau: Whitten, Alcott, Scaysbrook Trosiad: Steenson 3 Ciciau cosb: Steenson 3

Scarlets (13) 20

Ceisiau: Owen, Williams Trosiad: A Thomas 2 Cic gosb: A Thomas

Fe giciodd Gareth Steenson ei drydedd gic gosb wedi 61 munud i roi Caerwysg yn ôl ar y blaen

Er i'r Scarlets frwydro yn ôl yn yr ail hanner, fe wnaeth Caerwysg wrthsefyll eu her i ennill o ddeg pwynt.

Daeth y Scarlets, a gollodd 22-16 i Gaerwysg yr wythnos ddiwethaf, yn ôl o 17-3 i lawr hanner ffordd trwy'r hanner cyntaf i fod yn gyfartal 20-20 wedi 42 munud.

Ond fe giciodd Gareth Steenson ei drydedd gic gosb wedi 61 munud i roi Caerwysg yn ôl ar y blaen.

A seliwyd y fuddugoliaeth gyda chais y capten James Scaysbrook yn eiliadau olaf y gêm.

Montpellier 34-21 Gleision Caerdydd

Timoci Nagusa yn sgorio cais agoriadol Montpellier

Montpellier (17) 34

Ceisiau: Nagusa, Van Vuuren, Audrin, Beattie. Trosiad: Bustos Moyana 4 Ciciau cosb: Bustos Moyana 2

Gleision (8) 21

Ceisiau: Warburton, Cuthbert Trosiad: Patchell Ciciau cosb: Patchell 3

Hon oedd y bedwaredd gêm yn olynol i'r Gleision golli yng nghwpan Heineken, er iddynt frwydro'n galed yn erbyn Montpellier, a enillodd gyda phwynt bonws.

Roedd y Cymry ar y blaen 8-3 wedi cais Sam Warburton a chic gosb Rhys Patchell.

Ymatebodd y Ffrancod gyda cheisiau gan Timoci Nagusa, Rassie van Vuuren a Yohan Audrin.

Brwydrodd y Gleision yn ôl gyda chais gan Alex Cuthbert ond seliwyd y fuddugoliaeth i Montpellier gyda chais Johnnie Beattie wedi 58 munud.