Birmingham 0-1 Caerdydd

Joe Mason yn cael ei longyfarch gan Craig Bellamy

Gyda mantais o saith pwynt ar frig tabl y Bencampwriaeth mae Caerdydd yn agosáu at eu nod o ennill dyrchafiad i Uwch Gynghrair Lloegr y tymor nesaf.

Wedi ennill tair gêm dros y Nadolig mae'r Adar Gleision wedi dechrau 2013 gyda buddugoliaeth arall, ac roedd hwb ychwanegol o glywed fod Hull sydd yn yr ail safle dim ond wedi cael gêm ddi-sgôr oddi cartref yn Blackpool.

Sgoriodd Joe Mason ym munudau olaf yr hanner cyntaf mewn gêm gystadleuol iawn ym Mirmingham.

Manteisiodd Mason ar gamgymeriad gan y golwr Jack Butland, a fethodd ddal ei afael ar ergyd Craig Conway.

Daeth y gôl yn erbyn rhediad y chwarae, ac roedd Craig Bellamy yn ysbrydoledig i'r Cymry.

Dyma oedd 13eg buddugoliaeth Caerdydd gartref mewn 14 o gemau'r tymor hwn.

A chyda'r clwb sydd ar frig y gynghrair ar ddiwedd y flwyddyn galendr am y saith tymor diwethaf wedi mynd ymlaen i ennill dyrchafiad ar ddiwedd y tymor mae 'na wir obaith y bydd Caerdydd yn ymuno gydag Abertawe yn yr Uwch Gynghrair.