Cefngowyr i ddewis pris gêm bêl-droed ym Mhort Talbot

Caiff y cefnogwyr ddewis faint fyddan nhw'n ei dalu i weld y gêm rwhng Port Talbot a'r Bala

Caiff cefnogwyr pêl-droed gyfle arbennig i weld gêm ddydd Sadwrn am bris o'u dewis nhw.

Bwriad Clwb Pêl-Droed Port Talbot yw denu mwy o bobl i wylio'r gemau.

Mae'r clwb yn croesawu'r Bala ddydd Sadwrn yn Uwchgynghrair Cymru.

Y cynllun unigryw newydd "Talwch Faint a Fynnoch" ydi'r diweddara i ddenu mwy o gefnogwyr i Stadiwm GenQuip.

"Rydym wedi trio sawl peth dros y tymhorau diwethaf," eglurodd cadeirydd y clwb, Andrew Edwards.

'Diffyg cefnogaeth'

"Does yr un wedi llwyddo fel y byddwn ni wedi dymuno.

"Mae hwn yn gynllun newydd, gwahanol a gobeithio y daw ymateb positif ohono.

"Rydym wedi bod yn siomedig gyda'r diffyg cefnogaeth yn ystod y tymor ac mae'r chwaraewyr a'r rheolwr yn haeddu gwell.

"Rydym yn chwarae safon dda o bêl-droed ac mae'n siomedig nad ydi'r cyhoedd dyn cefnogi Uwchgynghrair Cymru a'r clybiau."

Eglurodd bod y clwb yn un cyfeillgar a theuluol a'u bod yn gwneud lot o waith gyda'r gymuned.

"Drwy redeg y cynllun yma rydym yn gobeithio y bydd pobl yn dod yma ac yn newid eu meddwl," ychwanegodd.

Fe fydd y gêm yn cychwyn am 2.30pm.