Helpu dianc: Rhyddhau dyn yn ddi-gyhuddiad

Dihangodd Brian Grady, 26 oed (ei enw arall yw Brian Revill) ddydd Llun

Mae dyn a gafodd ei arestio ar amheuaeth o helpu llofrudd i ddianc o garchar wedi ei ryddhau yn ddigyhuddiad.

Mae menyw 34 oed o Fryste a gafodd ei harestio ar amheuaeth o helpu Brian Grady ddianc o garchar agored Prescoed ger Brynbuga yn Sir Fynwy yn dal i gael ei holi.

Mae'r Heddlu yn dal i chwilio am Grady, 26 oed, a gafodd ei garcharu am lofruddio a lladrata.

Mae 'na rybudd y gallai fod yn beryglus.

Craith

Dihangodd Brian Grady (ei enw arall yw Brian Revill) ddydd Llun.

Cafodd Grady, o Fryste, isafswm o 11 mlynedd o garchar yn 2003 am lofruddio Liam Attwell.

Roedd Mr Attwell wedi ei drywanu pan heriodd griw o bobl ifanc oedd yn ceisio dwyn ffôn symudol.

Dywedodd yr heddlu: "Ni ddylai neb fynd yn agos ato."

Mae Grady'n 5 troedfedd 11 fodfedd o daldra a chanddo wallt brown golau a llygaid glas.

O dan ei lygad chwith mae craith.