Buddugoliaeth wych i Donaldson

Image copyright Reuters

Image caption Daw'r fuddugoliaeth yn dilyn tymor gorau Donaldson erioed yn 2012

Mae'r Cymro Jamie Donaldson wedi cipio buddugoliaeth fwyaf ei yrfa drwy ennill Pencampwriaeth Abu Dhabi ddydd Sul.

Cafodd Donaldson rownd o 68 yn ei rownd olaf ddydd Sul i orffen gyda chyfanswm o 274 - un ergyd yn well na'r Sais Justin Rose a Thorbjen Olesen o Ddenmarc.

Bydd y chwaraewr o Bontypridd yn derbyn siec am $336,726 am y fuddugoliaeth.

Daw ei lwyddiant yn dilyn ei dymor gorau erioed y llynedd.

Yn ystod 2012, llwyddodd Donaldson i ennill Pencampwriaeth Agored Iwerddon ar gwrs Portrush, ac yna gorffennodd yn gydradd seithfed ym Mhencampwriaeth PGA America - un o'r 'clasuron' ar gylchdaith y dynion ar draws y byd.

Ar ddechrau'r rownd olaf yn Abu Dhabi, roedd Donaldson ddwy ergyd y tu ôl i Rose, ond cafodd y Cymro bluen ar yr ail, y nawfed a'r 11eg twll wrth i'r Sais faglu.

Erbyn y twll olaf roedd gan y Cymro ddwy ergyd o fantais, ond method gyda chynnig o bum troedfedd i hanneru'r fantais.

Roedd hynny'n golygu fod gan Rose ac Olesen gyfle i orffen yn gyfartal gyda'r Cymro, ond methodd y ddau gyda'u cynigion gan roi'r fuddugoliaeth i Donaldson.

Pencampwriaeth Abu Dhabi - Sgôr Terfynol

1. Jamie Donaldson (Cymru) = -14 {274} - (67;70;69;68)

=2. Justin Rose (Lloegr) = -13 {275} - (67;69;68;71)

=2. Thorbjen Olesen (Denmarc) = -13 {275} - (68;69;69;69)

Cymry eraill :-

=32. Phillip Price (Cymru) = -3 {285} - (72;74;69;70)