Thomas ar y blaen yn Awstralia

Geraint Thomas yn ennill ail gymal y Tour Down Under

Enillodd Geraint Thomas ail gymal agos yn ras y Tour Down Under yn Awstralia i fynd ar y blaen yn y ras gyfan.

Aeth y seiclwr 26 oed gyda Team Sky ar y blaen ar Corkscrew Hill cyn curo'r gweddill yn Rostrevor.

"Roedd e'n ddiwrnod da - ro'n in teimlo'n dda o'r dechrau," emddai Thomas, a ennillodd fedal aur gyda thîm ymlid Prydain yn y Gemau Olympaidd yn Beijing 2008 a Llundain 2012.

"Fe ofalodd y tîm amdana' i, ac fe weithiodd pethau'n dda drwy'r dydd, a ddoe hefyd.

"Dwi wedi gweithio'n galed drwy'r gaeaf, ac ers gorffen ar y trac mae fy meddwl i'n llwyr ar y rasys ffordd.

"Ar ôl Beijing fe ges i 'chydig fisoedd o ymlacio, ond y tro hwn fe es i'n syth yn ôl i ymarfer ar y ffordd a meddwl am eleni."

Gorffennodd Thomas ar y blaen i Javier Moreno o dîm Movistar yn yr ail gymal, gyda Ben Hermans o dîm Radioshack yn drydydd.

Llwyddodd Thomas i osgoi damwain fawr tua diwedd y cymal a ddaeth â gobeithion pencampwr y byd, Philippe Gilbert, i ben.

Fe gymrodd le Thomas le Andre Griepel o'r Almaen fel arweinydd y ras gyfan.

Yng nghymal dydd Iau, bydd y seiclwyr yn teithio 139km o Unley i Stirling yn y bryniau uwchben Adelaide.