BBC Cymru Fyw

Euro 2020: Clec i obeithion Caerdydd i gynnal gemau?

Published
image copyrightGetty Images
image captionChwaraewyr Sbaen yn dathlu ennill Euro 2012
Gallai gobeithion Cymru o fod yn un o'r gwledydd sy'n cynnal pencampwriaeth Euro 2020 gael eu difetha oherwydd dim ond un maes awyr sydd yn y wlad.
Mae Llywydd UEFA, Michel Platini, wedi awgrymu y gallai'r bencampwriaeth gael ei chynnal mewn "12 neu 13 o wledydd".
Mae Cymru eisoes wedi datgan yn gyhoeddus eu dymuniad i gynnal y bencampwriaeth ar y cyd ag Iwerddon a'r Alban ac mae disgwyl i Bwyllgor Gweithredol Cymdeithas Bêl-droed Cymru benderfynu ynghylch y mater ar Fawrth 28.
Ond mae UEFA yn cynnig y dylai pob un o'r dinasoedd sy'n cynnal Euro 2020 gael eu gwasanaethu gan ddau faes awyr neu un â dwy derfynell.
Mae gan Faes Awyr Caerdydd un derfynell ac mae'r maes awyr mawr agosaf ym Mryste.
Nod y gofynion yw cadw dilynwyr gwledydd ar wahân wrth iddynt deithio i wylio gemau.
Mae Prif Weithredwr Cymdeithas Bêl-Droed Cymru, Jonathan Ford, wedi dweud ei fod am weld Caerdydd "yn un o'r dinasoedd sy'n cynnal y bencampwriaeth" o dan gynlluniau Platini.
"Dwi'n credu bod 2020 yn gyfle gwirioneddol gwych i ni," meddai.
Dyw Cymdeithas Bêl Droed Cymru ddim wedi gwneud sylw am y meysydd awyr.
Mae disgwyl i Ddulyn a Glasgow gynnig am y bencampwriaeth ac mae'n debyg y bydd Cymdeithas Bêl-droed Lloegr yn cynnig cynnal gemau'r rownd gynderfynol a therfynol yn Wembley.
Hefyd mae'n debyg y bydd Madrid, Rhufain, Berlin ac Istanbul yn gwneud ceisiadau ar gyfer cynnal y rownd derfynol.
Fe fydd y bencampwriaeth yn Ffrainc yn 2016.

Straeon perthnasol

  • Cymdeithas Bêl-Droed Cymru'n obeithiol o fod yn rhan o gynlluniau Euro 2020