Wrecsam 2-2 Southport
Wrecsam 2-2 Southport
Roedd yna ddechrau digon cyffrous i'r gêm wrth i Wrecsam geisio esgyn i frig Uwchgynghrair Blue Square Bet, ac fe ddaeth dwy gôl yn y 12 munud cyntaf.
Wrecsam gafodd y gyntaf - Johnny Hunt ddaeth o hyd i Danny Wright ar ymyl y cwrt cosbi, ac fe aeth ei ergyd yn daclu i gornel y rhwyd wedi dim ond saith munud.
Ond lai na phum munud yn ddiweddarach roedd hi'n gyfartal unwaith eto.
Karl Ledsham gafodd y bêl ar ymyl y cwrt a thanio ergyd i gornel ucha'r rhwyd i unioni'r sgôr.
Digon cyfartal oedd yr ystadegau, gyda'r ddau dîm yn rhannu'r meddiant, ac yn cael tua'r un nifer o ergydion at y gôl ar y cyfan.
Roedd hi'n noson oedd yn gofyn am ddyfal barhad - fe wnaeth Wrecsam hynny ac fe gawson nhw'u gwobrwyo wedi 70 munud pan rwydodd Joe Clarke i'w rhoi ar y blaen unwaith eto.
Ond fe ddigwyddodd yr un peth am yr eidro yn y gêm, sef bod Southport wedi dod yn gyfartal eto.
Gyda naw munud yn weddill o'r gêm, Andy Owens sgoriodd i'r ymwelwyr i ddifetha gobeithion y Dreigiau o godi i'r brig.
Fe gafodd Wrecsam eu cyfleoedd wrth iddyn nhw gael cyfres o giciau rhydd yn yr amser ychwanegwyd ar ddiwedd y 90 am anafiadau, ond doedd dim yn tycio, a bu'n rhaid i dîm Andy Morrell fodloni ar bwynt sy'n eu cadw yn ail yn y tabl.
Fe gafodd gêm Casnewydd yn erbyn Braintree ei gohirio oherwydd cyflwr y cae ar Rodney Parade, felly mae gan Gasnewydd gêm wrth gefn ar y ddau sydd uwch eu pennau yn yr adran.
| TABL UWCHGYNGHRAIR BLUE SQUARE | |||
|---|---|---|---|
| Gemau | Gwahaniaeth Goliau | Pwyntiau | |
| 1. Grimsby | 28 | 25 | 52 |
| 2. WRECSAM | 28 | 25 | 51 |
| 3. CASNEWYDD | 27 | 14 | 49 |
| 4. Forest Green | 28 | 17 | 48 |
| 5. Kidderminster | 29 | 16 | 47 |