Teyrnged i 'ferch gariadus'

Bethan Davies: 'Yn annwyl iawn'

Mae teulu menyw 41 oed o Rydaman, fu farw pan darodd ei char fws ar yr A483, wedi rhoi teyrnged iddi.

Bu farw Bethan Davies a chafodd 15 eu hanafu wrth gyffordd Llanedi ger Pont Abraham ddydd Mawrth.

Dywedodd y teulu ei bod hi'n "ferch gariadus, chwaer hoffus a ffrind a chydweithiwr heb ei ail."

Roedd y bws yn cario myfyrwyr Coleg Sir Gâr o gampws Rhydaman i Lanelli.

Dywedodd y teulu: "Roedd hi'n annwyl iawn a phawb yn y gymuned yn dwlu arni.

"Does dim modd cyfleu ein colled ni ... rydyn ni'n ddiolchgar iawn am y negeseuon cefnogaeth oddi wrth y teulu, ffrindiau a'r gymuned."

Bydd yr angladd yn Amlosgfa Llanelli am 10am ddydd Iau.

Mae'r heddlu'n dal i ymchwilio wedi i'r bws â 52 o seddau adael y ffordd a dylai unrhywun â gwybodaeth ffonio 101.