Cwpan Cymru: Yr wyth olaf yn llawn

  • 6 Chwefror 2013
Cwpan Cymru Image copyright Huw Evans picture agency
Image caption Pwy fydd yn codi Cwpan Cymru eleni?

Wedi i'r bedwaredd rownd ddod i ben nos Fawrth, mae'n wybyddus bellach pwy fydd yn wynebu ei gilydd yn rownd wyth olaf Cwpan Bêl-droed Cymru.

Fe fydd clybiau o'r Uwchgynghrair yn wynebu ei gilydd mewn dwy o'r gemau, ond fe fydd o leia' un tîm o'r cynghreiriau is yn y rownd gynderfynol.

Wedi i'r Fflint ennill eu lle yn yr wyth olaf ddydd Sadwrn, roedd dwy gêm yn weddill nos Fawrth.

Yn y gyntaf roedd hi'n rhy hawdd i'r deiliaid - Y Seintiau Newydd - wrth groesawu'r Rhyl i Groesoswallt.

Sgoriodd Chris Seargeant, Matty Williams, Kai Edwards, Michael Wilde a Ryan Fraughan mewn buddugoliaeth o 5-1.

Cyffrous

Roedd y gêm arall yn llawer mwy cyffrous.

Ar ddiwedd 90 munud roedd hi'n gyfartal 1-1 rhwng Y Drenewydd ag Airbus UK Brychdyn.

Luke Boundford roddodd y tîm cartref ar y blaen yn yr hanner cyntaf cyn i Luke McCarthy ddod ag Airbus yn gyfartal wedi 88 munud.

Doedd dim modd gwahanu'r ddau dîm yn yr hanner awr ychwanegol, a bu'n rhaid cymryd ciciau o'r smotyn i benderfynu pwy fyddai'n aros yn y gystadleuaeth.

Airbus aeth â hi o 5-4 i sicrhau eu lle yn rownd yr wyth olaf.

Cwpan Cymru - Rownd yr wyth olaf :-

Bangor v. Airbus UK Brychdyn;

Tre'r Fflint v. Y Barri;

Caerfyrddin v. Prestatyn;

Hwlffordd v. Y Seintiau Newydd.

Bydd y gemau'n cael eu chwarae ar benwythnos Mawrth 1, 2 neu 3.

Straeon perthnasol