Bryn Terfel a'i wraig wedi gwahanu

Mae asiant Bryn Terfel wedi cyhoeddi bod y canwr opera a'i wraig wedi gwahanu.

Rhyddhaodd Doreen O'Neill, asiant y canwr o Bontnewydd, Caernarfon, ers 26 blynedd, ddatganiad am y sefyllfa ddydd Llun.

Mae'r canwr 47 oed yn perfformio yn yr opera Falstaff gan Verdi yn Milan yn Yr Eidal.

Does dim disgwyl iddo ddychwelyd i Gymru tan ganol mis Mai.

Dywedodd y datganiad: "Gyda'r tristwch mwyaf, ychydig cyn y Nadolig, cytunodd Bryn Terfel a'i wraig Lesley i wahanu ac maen nhw'n delio â'r trefniadau angenrheidiol yn gyfeillgar.

"Er mwyn eu plant mae'r ddau'n gofyn i bawb barchu eu preifatrwydd ac ni fyddan nhw'n gwneud unrhyw sylwadau pellach."

Mae Mr Terfel a'i wraig wedi bod yn briod am 25 mlynedd ac mae ganddyn nhw dri o blant.