BBC Cymru Fyw

Dwy gôl i Fraizer Campbell wrth i Gaerdydd yn ennill yn erbyn Brisol City

Published
image copyrightHuw Evans picture agency
image captionSgoriodd Fraizer Campbell ar ei ymddangosiad cyntaf dros Gaerdydd yn Stadiwm Dinas Caerdydd

Caerdydd 2-1 Bristol City

Gêm amser cinio i Gaerdydd a'r Adar Glas yn cael buddugoliaeth o 2-1 yn erbyn Bristol City.

Mae'r fuddugoliaeth yn rhoi mwy o fantais i dîm Malky Mackay o 11 pwynt ar frig y Bencampwriaeth.

Sgoriodd Fraizer Campbell ddwy gôl Caerdydd, un wedi 45 munud yn yr hanner cyntaf a'r ail bron i chwarter awr ar ôl dechrau'r ail hanner.

Dyma oedd ei gôl gyntaf dros y clwb yn Stadiwm Dinas Caerdydd ar ôl arwyddo ym mis Ionawr.

Mae o bellach wedi sgorio tair gôl mewn tair gêm.

Fe wnaeth camddealltwriaeth ym munudau olaf y gêm arwain at Ben Nugent yn rhwydo i'w rwyd ei hun i roi gôl gysur i'r ymwelwyr ddychwelyd dros Bont Hafren.

Daeth gôl gyntaf Campbell wrth iddo ergydio i'r gornel ucha'.

Bygythiad

Roedd Tom Heaton, cyn-geidwad Caerdydd, wedi llwyddo i wneud sawl ergyd gampus ond llwyddodd Campbell i ergydio'i ail.

Er bod yr ymwelwyr wedi ennill tair o'r pedair gêm ddiwethaf o dan eu rheolwr newydd Sean O'Driscoll dal i wynebu bygythiad o ddisgyn y maen nhw ar ddiwedd y tymor.

Caerdydd wnaeth ddominyddu'r hanner cyntaf gyda Heaton yn gwneud yn wych i'r ymwelwyr nad oedd Yr Adar Glas ymhellach ar y blaen.

Fe wnaeth Craig Noone, Craig Bellamy a Campbell herio'r ceidwad.

Yn fuan ar ôl yr egwyl roedd gan Gaerdydd gais cry' am gic o'r smotyn, cais gafodd ei wrthod gan y dyfarnwr Eddie Ilderton.

Roedd hi'n ymddangos bod Campbell wedi cael ei ddal yn ôl gan Liam Fontaine.

Achlysurol oedd y bygythiad gan Bristol City ond roedd Liam Kelly bron a rhoi mantais iddyn nhw ar ôl iddo sylweddoli bod David Marshall ymhell oddi ar linell y gôl.

Bu'n rhaid i'r Albanwr gamu'n ôl yn gyflym cyn i ergyd Kelly fynd dros y traws.

Gwrthod ildio wnaeth yr ymwelwyr ar ôl ail gôl Caerdydd ac fe wnaeth Marshall arbediad gwych i rwystro ergyd Steve Davies rhag cyrraedd cefn y rhwyd.

Wrth iddo gael ei eilyddio gyda 18 munud o'r gêm yn weddill roedd 'na gymeradwyaeth fyddarol i Campbell gan y cefnogwyr.

Straeon perthnasol

  • Huddersfield 0-0 Caerdydd

Dolenni perthnasol ar y we

Dyw'r BBC ddim yn gyfrifol am gynnwys gwefannau allanol