Holi pedwar wedi honiadau o fasnachu pobl

Mae Heddlu Gogledd Cymru wedi arestio pedwar o bobl ar Lannau Dyfrdwy, Sir y Fflint, mewn cysylltiad â gorfodi pobl i weithio a masnachu dynol.

Roedd yr ymgyrch wedi'i chynnal ar y cyd rhwng nifer o asiantaethau a sefydliadau, gan gynnwys yr Asiantaeth Troseddau Difrifol (SOCA) a'r Groes Goch.

Y nod oedd sefydlu a oedd gweithwyr tramor yn ardal Glannau Dyfrdwy yn cael eu masnachu yn anghyfreithlon neu'n cael eu gorfodi i weithio.

Mae'r pedwar a gafodd eu harestio yn cael eu holi yng ngorsaf yr heddlu yn Wrecsam.

Dywedodd y Ditectif Arolygydd Dave Speed o Heddlu'r Gogledd: "Mae pedwar o bobl wedi cael eu harestio, ac mae'r Groes Goch a Byddin yr Iachawdwriaeth wedi sefydlu canolfanau croeso ar gyfer y gweithwyr."