Dinas yn paratoi i ddathlu gyda Chlwb Pêl-Droed Abertawe

Fe fydd cyfle i'r 33,000 o gefnogwyr oedd yn Wembley a miloedd mwy barhau i ddathlu llwyddiant Yr Elyrch

Mae disgwyl miloedd o gefnogwyr Yr Elyrch ymgasglu yng nghanol Abertawe i ddathlu camp y pêl-droedwyr enillodd Gwpan y Gynghrair dros y penwythnos.

Yn Wembley ddydd Sul fe wnaeth Abertawe ennill y gwpan drwy guro Bradford City o 5-0.

Ym mlwyddyn canmlwyddiant y clwb fe fydd 'na gryn ddathlu wrth i'r tîm orymdeithio drwy'r ddinas gyda'r Gwpan.

Abertawe yw'r clwb cyntaf o Gymru i ennill y gwpan.

Mae'n golygu y bydd tîm Michael Laudrup yn chwarae yn Ewrop y tymor nesaf.

'Diolchgar'

Fe fydd yr orymdaith ar fws agored yn cychwyn o ganol y ddinas, o flaen gwesty'r Ddraig ar Ffordd y Brenin am 4.30pm.

Fe fydd y daith yn dod i ben yn Neuadd y Ddinas tua 5.30pm.

Y tîm a'r cefnogwyr yn y ddinas yn 2011 wedi i'r clwb ennill dyrchafiad i'r Uwch Gynghrair

Dywedodd y cyngor sir y bydd ffyrdd yn cau er mwyn achosi cynllied o drafferthion â phosib ac i warchod diogelwch y cefnogwyr.

O KFfordd y Brenin fe fydd y bws yn teithio tuag at Ffordd y Gorllewin, ymlaen ar hyd Heol San Helen i Neuadd y Ddinas.

Bydd y tîm, rheolwyr a staff y clwb yn mynychu digwyddiad yn ddiweddarach yn Neuadd y Ddinas.

"Rydym eisiau dangos i'r tîm ein bod yn ddiolchgar am yr hyn y maen nhw wedi ei wneud i'n dinas," meddai arweinydd y cyngor, y Cynghorydd David Phillips.

"Rydym am roi cyfle i'r 33,000 oedd yn Wembley a'r rhai na allai fynd yno i ddangos eu cefnogaeth i'r arwyr.

"Roedd 'na filoedd yn y ddinas pan wnaeth y tîm sicrhau dyrchafiad (yn 2011) ac rydym yn disgwyl cymaint eto.

"Dim ots os nad ydach chi'n gefnogwr pêl-droed a'i pheidio, mae hyn yn gwbl bwysig i'r ddinas.

"Dewch yma a dewch i gefnogwyr y tîm."

Fe ychwanegodd Arglwydd Faer Abertawe, Dennis James, bod hyn yn gyfle arbennig i'r Elyrch ac i Abertawe.

"Ar ôl y dyrchafiad i'r Uwch Gynghrair, mae digwyddiadau dydd Sul yn gychwyn pennod newydd yn hanes rhyfeddol y clwb."

Unwaith i'r orymdaith basio fe fydd ffyrdd y ddinas yn ail agor.