Arestio trydydd dyn wrth ymchwilio i lofruddiaeth ffermwr

Roedd Llywelyn Thomas yn ffermio yng Nghymru cyn symud i Loegr 13 blynedd yn ôl

Mae trydydd dyn wedi cael ei arestio mewn cysylltiad â llofruddiaeth Llywelyn Thomas, ffermwr 76 oed o Gymru, yn ei gartre' yn Sir Gaergrawnt.

Bydd John Smith, 66 oed o Bridlington yng Ngogledd Humberside, yn ymddangos o flaen ynadon yng Nghaergrawnt.

Mae o wedi'i gyhuddo o gynorthwyo troseddwr.

Mae dau ddyn eisoes wedi'u cyhuddo o lofruddio Mr Thomas.

Bydd Frankie Parker, 25 oed o Ely, a Gary Smith, 20 oed, heb gyfeiriad sefydlog, yn mynd o flaen llys ym mis Ebrill.

Cafwyd hyd i Mr Thomas yn farw yn ei gartref yn Chittering ar Ragfyr 18, 2011.

Roedd plismyn yn credu ei fod wedi marw'r diwrnod cynt.

Dangosodd archwiliad post mortem iddo farw o anafiadau i'w ben a'i wyneb.

Roedd Mr Thomas yn wreiddiol o ardal Sain Ffagan ger Caerdydd.