Abertawe: Rangel i aros tan 2016

Angel Rangel Image copyright Huw Evans picture agency

Mae amddiffynnwr Clwb Pêl Droed Abertawe Angel Rangel wedi ymestyn ei gytundeb â'r Elyrch gan olygu y bydd yn aros yn Stadiwm Liberty tan 2016.

Roedd cytundeb gwreiddiol Rangel, 30 oed, fod i ddod i ben ym Mehefin 2014.

Mae Rangel wedi chwarae rhan allweddol yn llwyddiant yr Elyrch ers iddo ymuno â nhw o glwb Terrassa yn Sbaen chwe blynedd yn ôl.

Roedd yn aelod o'r tîm wnaeth guro Bradford City 5-0 i gipio Cwpan Capitol One yn ddiweddar sy'n golygu bydd yr Elyrch yn chwarae yng Nghwpan Europa y tymor nesaf.

'Gwobrwyo'

Mae Rangel, Michu, Leon Britton, Wayne Routledge a Garry Monk wedi arwyddo cytundebau newydd yn y misoedd diwethaf.

"Rwy'n hapus yma, rwyf wedi priodi merch Gymreig ac rwy'n adeiladu tŷ yn Abertawe," meddai Rangel.

"Rwy'n teimlo fel Cymro erbyn hyn."

"Mae'r ffaith fod gymaint o chwaraewyr wedi arwyddo cytundebau newydd yn dangos bod pethau yn mynd yn dda yma.

"Mae'r clwb yn sylweddoli bod y chwaraewyr yn gwneud yn dda ac mae'r bwrdd a'r cadeirydd, Huw Jenkins, yn ein gwobrwyo am ein llwyddiant."

Mae Abertawe yn yr wythfed safle yn yr Uwchgynghrair ar hyn o bryd gyda 40 pwynt.

Bydd yr Elyrch yn teithio oddi cartref i herio West Bromwich Albion (3pm) ddydd Sadwrn.

TABL UWCHGYNGHRAIR LLOEGR
Gemau Gwahaniaeth Goliau Pwyntiau
1. Man United 28 37 71
2. Man City 28 27 59
3. Tottenham 28 16 54
4. Chelsea 28 26 52
5. Arsenal 28 21 47
6. Everton 28 9 45
7 Lerpwl 28 19 42
8.ABERTAWE 28 5 40
9. WBA 28 1 40