Diflaniad Kyle Vaughan: Dal i chwilio wedi 10 wythnos

Fe ddiflannodd Kyle Vaughan ar Ragfyr 30, 2012

Mae'r heddlu sy'n ymchwilio i ddiflaniad dyn ifanc 24 oed o ardal Trecelyn yn parhau gyda'u hymholiadau 10 wythnos ar ôl iddo ddiflannu.

Ddydd Sadwrn fe fyddan nhw'n holi ac yn codi ymwybyddiaeth cefnogwyr rygbi ar drenau ar y ffordd i'r gêm yn Stadiwm y Mileniwm.

Does neb wedi gweld Kyle Vaughan ers Rhagfyr 30, 2012.

Mae'r heddlu'n tybio ei fod bellach wedi marw.

Dywedodd Heddlu Gwent bod staff arbenigol yn chwilio amdano.

Mae wyth o bobl wedi eu harestio a'u rhyddhau ar fechnïaeth mewn cysylltiad â'i ddiflaniad.

Mae disgwyl iddyn nhw ateb eu mechnïaeth ar Fawrth 21.

Y tro diwethaf i Kyle Vaughan gael ei weld oedd ar yr A467 rhwng Rhisga a Cross Keys rhwng 11:00pm a 11:45pm ar Ragfyr 30 y llynedd.

Roedd yn gwisgo crys-T tywyll, trowsus tri-chwarter denim, esgidiau gwyn, ac yn gwisgo cadwyn aur a het dywyll.

Am 11:45pm y noson honno daeth yr heddlu o hyd i'w gar Peugeot 306 wedi ei adael ar ochr y ffordd - roedd wedi bod mewn gwrthdrawiad.

Dylai unrhyw un sydd â gwybodaeth, neu a welodd Kyle Vaughan ar Ragfyr 30, ffonio'r heddlu ar 101, neu gysylltu gydag elusen Taclo'r Tacle yn ddienw ar 0800 555111.