Digwyddiad paralympaidd mawr i Abertawe

Enillodd Aled Sion Davies fedal aur a medal efydd yn y Gemau Paralympaidd yn Llundain yn 2012

Mae dinas Abertawe wedi cael ei dewis i gynnal Pencampwriaethau Ewropeaidd y Pwyllgor Paralympaidd Rhyngwladol ym mis Awst 2014.

Dyma fydd y tro cyntaf i'r bencampwriaeth gael ei chynnal unrhyw le yn y DU.

Y gobaith yw y bydd y digwyddiad yn manteisio ar effaith y Gemau Paralympaidd yn Llundain yn 2012.

Jon Morgan yw cyfarwyddwr Chwaraeon Anabledd Cymru, a dywedodd: "Rydym yn credu mai Cymru ac Abertawe yw'r llwyfan perffaith i gynnal cystadlaethau rhyngwladol fel hyn."

Bydd tua 600 o athletwyr o 40 o wledydd yn cystadlu yn y digwyddiad a fydd yn cael ei gynnal ym Mhrifysgol Abertawe.

'Gorchestion rhyfeddol'

Cafodd y Bencampwriaeth ddiwethaf ei chynnal yn haf 2012 yn Stadskanaal yn yr Iseldiroedd.

Bu 520 o athletwyr o 38 gwlad yn cymryd rhan yno a, dros y pum niwrnod o gystadlu, Rwsia ddaeth i frig y tabl medalau. Fe gafodd 14 record byd eu torri gan athletwyr yn ystod y gemau.

Mae Jon Morgan yn credu y bydd cynnal y digwydd yn hwb pellach i chwaraeon anabledd yng Nghymru.

"Fe fydd yn adeiladu ar orchestion rhyfeddol athletwyr o Gymru yn Llundain yn 2012, ac yn mynd â'n hagenda gwaddol ymlaen, ynghyd â rhaglenni cenedlaethol yr ydym wedi eu datblygu dros y deng mlynedd diwethaf.

"Rydym wedi ymrwymo i gynnal Pencampwriaeth Ewrop eithriadol y gall Abertawe a Chymru gyfan fod yn falch ohoni."