Teyrngedau i Matthew MacMillan a Mitchell Evans wedi damwain car ym Mhontardawe

Matthew MacMillan a Mitchell Evans Image copyright South Wales Police
Image caption Roedd Matthew MacMillan a Mitchell Evans yn teithio yn y car nos Fawrth

Mae teuluoedd dau ddyn fu farw ar ôl i'r car yr oedden nhw'n teithio ynddo wyro oddi ar y ffordd a tharo coeden yng Nghwm Tawe, wedi talu teyrnged iddyn nhw.

Fe ddigwyddodd y ddamwain ar yr A474 Ffordd Castell-nedd yn Fforest Goch ger Pondardawe tua 7pm nos Fawrth.

Roedd Matthew MacMillan, o Lansawel, a Mitchell Evans o Gimla, Castell-nedd, yn teithio mewn car Renault Clio arian.

Roedd y ddau yn 21 oed.

Dywedodd yr heddlu bod trydydd person yn y car ac yn yr ysbyty yn cael triniaeth.

Fe ddywedodd teulu Mr MacMillan, oedd yn cael ei adnabod yn lleol fel Millan, ei fod yn ŵr ifanc hyfryd, cariadus a phrydferth.

Colled

"Roedd yn frawd i Siobhan, Christopher ac Ellouise ac yn dad balch i Macey a'i mam Becky, yn ewythr arbennig i Harvey ac ŵyr Paul a Gloria," meddai'r datganiad a gafodd ei ryddhau ar ran y teulu gan Heddlu De Cymru.

"Fe fydd yn cael ei golli gan y teulu cyfan.

"Roedd pawb yn gwenu gyda fo. Roedd ganddo gymaint o ffrindiau arbennig."

Fe ychwanegodd ei fam, Sian, ei bod wedi ei garu erioed ac y bydd yn parhau i wneud.

"Dwi'n gwybod y bydd yn edrych i lawr gyda'i wen hyfryd."

Apêl

Fe wnaeth Alisa a Ieuan Evans dalu teyrnged i'w mab Mitchell, gan ddweud bod eu byd wedi ei droi ben i'w waered wrth i'w mab "prydferth" gael ei ladd.

"Yn fab arbennig, brawd a ŵyr.

"Fydd bywyd fyth yr un fath."

Mae swyddogion heddlu arbenigol yn parhau i gynnig cefnogaeth i'r teuluoedd.

Mae'r heddlu yn apelio am dystion, gan gynnwys unrhyw un welodd y gwrthdrawiad, arhosodd i gynnig cefnogaeth neu unrhyw un welodd y cerbyd cyn y ddamwain.

Os oes gan unrhyw un wybodaeth, fe ddylen nhw gysylltu gydag uned plismona ffyrdd Heddlu De Cymru ar 101 neu Taclo'r Tacle yn ddienw ar 0800 555 111.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.