Tata: Arestio 14 yn sgil ymchwiliad i dwyll
- Cyhoeddwyd
Mae Heddlu Dyfed-Powys wedi arestio 14 a'u rhyddhau ar fechnïaeth fel rhan o ymchwiliad i honiadau bod cerbydau wedi'u prynu a'u gwerthu'n anghyfreithlon.
Cadarnhaodd cwmni dur Tata fod "nifer o staff" yn ne Cymru'n gysylltiedig â'r ymchwiliad.
Dywedodd yr heddlu eu bod yn ymchwilio i honiadau bod cerbydau wedi eu prynu a'u hailwerthu'n anghyfreithlon yn Ne Cymru.
Mae gan weithwyr Tata yr hawl i ostyngiad o hyd at 20% pris cerbydau, gan gynnwys ceir Jaguar a Land Rover, sy'n cael eu cynhyrchu gan grŵp Tata.
Heb ei wahardd
Ym Mhort Talbot a Thostre ger Llanelli mae safleoedd `y cwmni.
Mae BBC Cymru yn deall nad yw aelod staff wedi ei wahardd o'i waith am nad yw'r ymchwiliad yn ymwneud â methiannau technegol a bod y mater wedi ei godi'n allanol.
Dywedodd llefarydd a ran yr heddlu: "Mae ein tîm troseddau ariannol yn gallu cadarnhau eu bod yn ymchwilio i honiadau sy'n ymwneud â phrynu a gwerthu cerbydau'n anghyfreithlon.
"Mae 14 o bobl wedi eu harestio mewn perthynas â throseddau twyll ac maen nhw wedi eu rhyddhau ar fechnïaeth wrth i'r ymchwiliadau barhau."
Dywedodd llefarydd ar ran cwmni Tata fod y cwmni'n ymwybodol o'r ymchwiliad "sy'n ymwneud â nifer o staff y cwmni yn Ne Cymru".
Ychwanegodd fod y cwmni'n cydweithredu â'r heddlu.
"Mae gonestrwydd personol yn rhan bwysig o'n hymddygiad corfforaethol yn Ne Cymru fel ym mhobman arall."