Morgannwg yn dechrau tymor newydd

Mae Mark Wallace yn holliach ar gyfer dechrau'r tymor newydd

Mae capten tîm criced Morgannwg Mark Wallace wedi cael gwybod ei fod yn holliach ar gyfer gêm gyntaf y sir yn y tymor newydd ddydd Mercher.

Cafodd y wicedwr anaf i'w fawd ddydd Sadwrn mewn gêm gyfeillgar baratoadol, ond mae darlun pelydr-X wedi dangos nad oes difrod mawr.

Mae'r hyfforddwr Matthew Mott wedi dweud ei fod yn disgwyl mwy gan y tîm y tymor hwn, ac mae un o'u ser, Jim Allenby, wedi rhybuddio bod angen i'r clwb ennill dyrchafiad er lles y clwb i'r dyfodol.

Mae Murray Goodwin a Michael Hogan yn debyg o ennill eu capiau cyntaf i'r sir wrth i Forgannwg groesawu Sir Northants i Stadiwm Swalec ar gyfer y gêm yn ail adran Pencampwriaeth LV=.

Credir mai Ben Wright fydd yn cael ei ddewis i agor y batiad gyda Will Bragg yn hytrach na Gareth Rees.

Y tebygrwydd yw y bydd y chwaraewr amryddawn Graeme Wagg hefyd yn dechrau'r gêm, ac yn cadw'r bowliwr cyflym Huw Waters allan o'r tîm.

Carfan Morgannwg :

WD Bragg, BJ Wright, SJ Walters, MJ North, MW Goodwin, J Allenby, MA Wallace (capt and wk), GG Wagg, DA Cosker, MG Hogan, MT Reed a HT Waters.