Lansiad swyddogol Rali Cymru GB

Image copyright Getty Images

Bydd Gweinidog Economi, Gwyddoniaeth a Thrafnidiaeth Cymru Edwina Hart yn Llandudno ddydd Gwener i gyhoeddi'n swyddogol cartref newydd Rali Cymru Prydain Fawr 2013.

Wedi blynyddoedd o gael ei chynnal yn y de, fe fydd y rali geir yn cael ei chynnal yn y gogledd ym mis Tachwedd eleni.

Dyma fydd rownd olaf Pencampwriaeth Ralïo'r Byd yn 2013.

Yn ymuno â'r gweinidog fydd Andrew Coe ar ran y trefnwyr International Motor Sports ac arweinydd Cyngor Conwy, Dilwyn Roberts.

Bydd seremoni agoriadol y digwyddiad yn cael ei chynnal yng Nghonwy ar y nos Iau, gyda dathliadau'r llinell derfyn yn Llandudno ar y prynhawn Sul.

Bydd y llwybr dros bedwar diwrnod o gystadlu yn fwy cywasgedig, gyda'r mwyafrif o'r Cymalau Arbennig yn cael eu hamseru yng nghoedwigoedd Cymru.

Hefyd bydd cymalau gyda'r nos ac addas i deuluoedd yn cael eu hailgyflwyno, a bydd modd i gefnogwyr gael ystod ehangach o docynnau am brisiau is nag o'r blaen.

Ddydd Gwener, fe fydd Mr Hart a Mr Coe yn cyhoeddi union lwybr y rali am eleni ynghyd â pholisi ticedi newydd sy'n ceisio denu mwy o bobl, yn enwedig teuluoedd, i'r digwyddiad.

Bydd y lansiad swyddogol yn digwydd yn Venue Cymru am 11:30am ddydd Gwener, Mai 17.