Selby allan o Gemau'r Gymanwlad

Andrew Selby Image copyright Huw Evans picture agency
Image caption Roedd Andrew Selby yn un o brif obeithion Cymru am fedal aur yn Glasgow yn 2014

Ni fydd y bocsiwr Andrew Selby, enillodd fedal aur ym Mhencampwriaeth Ewrop, yn cael cystadlu dros Gymru yn Gemau'r Gymanwlad y flwyddyn nesaf yn Glasgow.

Mae'r bocsiwr pwysau plu wedi ymuno â chyfundrefn focsio broffesiynol sydd yn gwarchod ei statws ar gyfer y Gemau Olympaidd, ac fe fydd yn ymladd ar y gylchdaith ryngwladol y flwyddyn nesaf.

Mae hynny'n golygu y bydd ganddo'r hawl i gystadlu yn Rio de Janeiro yn 2016, ond nid yw'r cytundeb yn cynnwys darpariaeth i'w rhyddhau ar gyfer Gemau'r Gymanwlad.

Mewn datganiad, dywedodd y Gymdeithas Focsio Ryngwladol: "Mae'r gyfundrefn yn cynnig cyfle unigryw i ymladdwyr droi'n broffesiynol tra'n cadw eu statws Olympaidd.

"Mae hynny'n pontio bwlch rhwng bocsio amatur agored a bocsio proffesiynol."

Selby yw'r bocsiwr cyntaf o Brydain i amddiffyn ei deitl Ewropeaidd wedi iddo guro Michael Conlan o Iwerddon ym Minsk y mis diwethaf.

Enillodd y bocsiwr 24 oed o'r Barri fedal arian ym Mhencampwriaeth Amatur y Byd yn 2011 ac roedd yn cystadlu yn y Gemau Olympaidd yn Llundain yn 2012, lle collodd yn rownd yr wyth olaf.

Straeon perthnasol