TNS allan o Ewrop

Roedd disgwyl torf o dros 20,000 o gefnogwyr i wylio TNS yn herio Legia Warsaw yng Nghynghrair y Pencampwyr

Mae'r Seintiau Newydd allan o Gynghrair y Pencampwyr ar ôl colli o 1-0 yn unig ar faes Legia Warsaw yng Ngwlad Pwyl nos Fercher.

Roedden nhw'n chwarae yn ail gymal yr ail rownd ragbrofol ac fe sicrhaodd gôl gan Vladimir Dvalishvili bod y Pwyliaid yn mynd â hi 4-1 ar gyfanswm goliau.

Roedd pencampwyr Uwch Gynghrair Cymru wedi amddiffyn yn 'styfnig, gyda'r gôl-geidwad Paul Harrison yn serennu.

Ond doedd ochr Craig Harrison ddim yn edrych fel petai nhw am wyrdroi'r golled o 3-1 ar ôl y cymal cynta' yng Nghymru.

Roedd y rheolwr wedi rhybuddio ei chwaraewyr i ddisgwyl "twrw mawr" yn Warsaw, a dyna'n union oedd yn eu disgwyl.

Roedd y clwb o Gymru dan bwysau o'r munudau agoriadol wrth i Legia elwa o fylchau ar y cae.

Bu'n rhaid i Harrison fynd i'w waith wedi pum munud i ymateb i ergyd am gôl gan Miroslav Radovic.

Aeth y Seintiau yn agos wedyn, wrth i Michael Wilde fethu croesiad gan Chris Marriott o drwch blewyn.

Ond am y rhan fwyaf o'r gêm, bu'n rhaid i TNS amddiffyn yn ffyrnig, gyda Legia Warsaw yn rheoli i'r diwedd.

Nos Iau bydd Prestatyn yn herio Rijeka yn ail gymal ail rownd ragbrofol Cynghrair Europa yn Y Rhyl.