Brayford yn arwyddo i Gaerdydd
- Cyhoeddwyd
Mae cynnig clwb Caerdydd i arwyddo John Brayford wedi ei dderbyn
Mae clwb pêl-droed Caerdydd wedi arwyddo'r amddiffynwr John Brayford o dîm Derby County.
Mae adroddiadau yn awgrymu bod Caerdydd wedi talu tua £1.5 miliwn am y chwaraewr.
Ym mis Mehefin fe wrthododd Derby County gynnig arall gan Wigan Athletic oedd tua £1 miliwn.
Credir fod West Ham hefyd wedi bod gyda diddordeb prynu'r chwaraewr 25 oed ond Caerdydd enillodd y frwydr.
Mae Brayford wedi dweud ei fod yn edrych ymlaen i ymuno gyda'r Adar Gleision.
"Pan glywais fod diddordeb gan Gaerdydd i fy arwyddo roedd gen i ddiddordeb mawr, yn enwedig i gael cyfle i brofi fy sgiliau yn yr Uwch Gynghrair ac ar y lefel uchaf," meddai.
"Mae Derby yn glwb pwysig i mi, ond doeddwn i methu anwybyddu'r cyfle yma."