Dŵr yn achosi 'difrod difrifol' yn Ysbyty Plant Cymru

Bu'n rhaid i gleifion a staff adael yr ysbyty ddydd Llun

Mae un o benaethiaid Bwrdd Iechyd Caerdydd a'r Fro wedi dweud bod llifogydd yn Ysbyty Plant Cymru yng Nghaerdydd fel "digwyddiad difrifol".

Bu'n rhaid i gleifion a staff adael yr ysbyty ddydd Llun oherwydd difrod gan ddŵr i'r pedwar llawr.

"Roedd timau o weithwyr yn sicrhau bod plant yn symud o'r adeilad, yn gyflym ac yn effeithiol," meddai Dr George Findlay, cyfarwyddwr clinigol y bwrdd gyda chyfrifoldeb am wasanaethau plant a menywod.

Dywedodd llefarydd ar ran Bwrdd Iechyd Prifysgol Caerdydd a'r Fro fod y staff yn gofalu am y plant yn yr Ysbyty Athrofaol tra bod gweithwyr yn asesu maint y difrod.

18 o gleifion

Oherwydd glaw trwm llifodd dŵr i mewn i'r adeilad gan amharu ar y cyflenwad trydan.

Cafodd 18 o gleifion eu heffeithio ond nid amharwyd ar wasanaethau brys na llawdriniaethau.

Mae disgwyl y bydd y plant yn dychwelyd o fewn 36 awr pan fydd yr adeilad yn ddiogel, meddai'r llefarydd.

Mae ymchwiliad i'r digwyddiad ar y gweill.