Pallial: Rhyddhau dyn 62 oed ar fechnïaeth

John Allen yn cyrraedd Llys Ynadon Yr Wyddgrug ddechrau mis Awst

Mae dyn 62 oed gafodd ei arestio fel rhan o'r ymchwiliad i gam-drin mewn cartrefi plant yn y 1980au wedi cael ei ryddhau ar fechnïaeth yr heddlu.

Cafodd ei arestio yn Wrecsam ar amheuaeth o droseddau rhyw difrifol ac ymosodiadau rhywiol ar ddau fachgen 14 a 15 oed yn y 1980au.

Bydd ar fechnïaeth tan fis Tachwedd.

Fe oedd y pumed i gael ei arestio yn ystod Ymgyrch Pallial sy'n ymchwilio i honiadau diweddar o gam-drin flynyddoedd yn ôl yn y system gofal plant.

Hyd yma mae un dyn wedi cael ei gyhuddo o droseddau fel rhan o'r ymchwiliad.

Cafodd John Allen, 72 oed o Ipswich yn Suffolk, ei gyhuddo o 32 o droseddau'n ymwneud â 14 o fechgyn ac un ferch oedd rhwng saith a 15 oed.