Ymchwiliad Pallial: Arestio dau yn Sussex

Mae dyn a dynes wedi eu harestio fel rhan o ymchwiliad Pallial i honiadau o gamdrin plant mewn cartrefi gofal yng ngogledd Cymru yn y gorffennol.

Cafodd y ddau eu harestio yn Sussex ar amheuaeth o ymosod yn anweddus ar fachgen.

Digwyddodd y troseddau honedig rhwng 1975 a 1976.

Bydd y dyn 63 oed a'r ddynes 60 oed yn cael eu holi mewn gorsaf heddlu yn Sussex.

Y rhain yw'r chweched a'r seithfed i gael eu harestio fel rhan o Ymgyrch Pallial.

Hyd yma, mae un person wedi ei gyhuddo o gyfanswm o 32 o droseddau rhyw difrifol.