Cyhuddo pump o anrhefn dreisgar
- Cyhoeddwyd
Mae pum dyn sydd wedi eu cyhuddo o fod yn rhan o ddigwyddiad treisgar ar strydoedd Casnewydd yn ystod gŵyl y banc ym mis Awst wedi ymddangos gerbron llys.
Cafodd Ethan Brown, Steven Baker a Michael Attard, ill tri yn 20 oed ac o Gaerdydd, eu cadw yn y ddalfa, ynghyd â David Hopkins a Daniel Short, y ddau yn 27 oed o Fryste.
Maen nhw i gyd wedi eu cyhuddo o anrhefn dreisgar a bod â chyffuriau yn eu meddiant gyda bwriad o gyflenwi, ac mae gyrwyr y ddau gerbyd hefyd yn wynebu cyhuddiad o yrru'n beryglus.
Cafodd cais Mr Brown am fechnïaeth ei wrthod.
Dywedodd y Barnwr Tom Crowther QC bod y digwyddiad ar Stryd y Banc yng Nghasnewydd wedi bod yn "beryglus i'r cyhoedd".
Dywedodd bod y dynion o Gaerdydd a Bryste wedi cyfarfod yn y gwasanaethau ym Magwyr, yna fe wnaeth un o'r ceir ddilyn y llall cyn dod i stop yng Nghasnewydd.
Mae diffynnydd arall yn parhau yn yr ysbyty gydag anafiadau a gafwyd yn ystod y digwyddiad.
Daeth yr heddlu o hyd i wn aer, cyllyll a hanner cilo o ganabis ar y safle yn Stryd y Banc.