Gwobr i ferch wnaeth sefyll arholiad dau ddiwrnod ar ôl cael babi

Mae Zoe yn credu'n gryf ym mhwysigrwydd addysg

Mae mam o Gaernarfon wnaeth sefyll arholiad dau ddiwrnod ar ôl rhoi genedigaeth wedi derbyn gwobr am ragori yn ei hastudiaethau.

Roedd Zoe Roberts, 23, yn ôl yn y coleg yn sefyll arholiad diploma rhyw 48 awr wedi iddi ddyfod yn fam am y trydydd tro.

Dywedodd y ferch, wnaeth ragori wrth wneud diploma mewn gwyddorau cymdeithasol yng Ngholeg Menai, fod amseriad y geni "ddim yn ddelfrydol".

Bydd Zoe nawr yn mynd ymlaen i wneud cwrs gyda'r Brifysgol agored tra hefyd yn gweithio i Gyngor Gwynedd.

'Pwysigrwydd addysg'

Yn siarad am ei phrofiad ym mis Mawrth eleni, dywedodd Zoe: "Ro'n i'n benderfynol o sefyll yr arholiad gan fy mod i'n gwybod pa mor bwysig oedd o.

"Doedd amseru Harvey ddim yn ddelfrydol gan ei fod o bum wythnos yn gynnar, ond fe wnes i ei ddefnyddio fo, Tylor a Sophea [ei phlant eraill] fel ysbrydoliaeth gan fy mod i'n awyddus iddyn nhw gael eu magu yn deall pwysigrwydd addysg a sylwi fod pethau fel hyn yn werth gweithio amdanyn nhw."

Mae Zoe eisoes wedi llwyddo i gael swydd yn adran gwasanaethau cymdeithasol Cyngor Gwynedd fel gweithiwr cefnogol.

Bydd hi hefyd yn parhau gyda'i hastudiaethau wrth iddi wneud gradd mewn gwaith cymdeithasol gyda'r Brifysgol Agored.