Caerdydd yn ystyried adroddiad puteindra
- Cyhoeddwyd
Mae arweinwyr cyngor yn ystyried os bydd camau'n cal eu cymryd er mwyn mynd i'r afael a phuteindra ar strydoedd Caerdydd.
Yn ôl ymchwil Cyngor Caerdydd mae rhyw 120 o fenywod yn ymwneud â phuteindra ar strydoedd y ddinas.
Dywedodd adroddiad diweddar gan bwyllgor o fewn y cyngor fod llawer ohonynt â phroblemau cyffuriau, a bod defnydd heroin a chrac cocên yn uchel.
Bydd y cabinet yn penderfynu ddydd Llun os bydd cynllun fyddai'n gweld puteiniaid yn cael eu symud o ardaloedd preswyl yn y ddinas, gan gynnwys Grangetown a Sblot.
'Dim strategaeth'
Roedd yr adroddiad, gafodd ei hysgrifennu gan Bwyllgor Craffu Gwasanaethau Cymunedol ac Oedolion y cyngor, yn dweud nad oedd "strategaeth gynhwysfawr" ar gyfer delio gyda gweithwyr rhyw.
Mae puteindra stryd yn fater sydd wedi bod yn codi ei ben droeon yng Nghaerdydd, ers i ailddatblygiad hen ardal golau coch Caerdydd wthio'r gweithwyr rhyw i ardaloedd Sblot a Grangetown.
Cyn hynny roedd y mwyafrif llethol ohonynt yn gweithio yn ardal y dociau, o gwmpas hen dafarn y Custom House.
Yn yr adroddiad mae swyddogion yn argymell "ystyried manteision ac anfanteision dargyfeirio gwaith rhyw stryd a phuteindra i ardaloedd sydd ddim yn rhai preswyl er mwyn lleihau'r effaith ar ardaloedd preswyl".
'Pethau'n gwella'
Un sydd wedi bod yn dweud ers tro byd bod angen gwneud rhywbeth am y sefyllfa yw Valerie Howard o Grangetown.
Mae hi wedi bod yn arwain ymgyrch wedi ei anelu at yr Ymddiriedolaeth Heddlu a'r Gymuned lleol.
Dywedodd: "Rwyf dal yn berchen ar lyfr log roeddwn yn defnyddio i ysgrifennu lawr yr hyn roeddwn yn weld.
"Rwy'n credu eu bod nhw dal yn yr ardal ond mae pethau'n gwella.
"Maen nhw wedi symud, mae'n ymddangos. Wyddwn i ddim i le."
Argymhellion
Mae nifer o argymhellion yn yr adroddiad ynglŷn â sut fyddai'n bosib rhoi cymorth i buteiniaid ddianc o'r diwydiant rhyw.
Mae'r rhain yn cynnwys:
- Lleihau niwed ac amddiffyn cymunedau;
- Hyfforddi staff iechyd a gwella iechyd a safon byw gweithwyr rhyw;
- Ystyried darparu addysg ar gyfer grwpiau ysgol uwchradd ynglŷn â pherthnasau positif;
- Ystyried os oes angen ymchwil pellach i sut mae pobl yn mynd fewn i'r diwydiant.
Mae swyddogion wedi dweud y dylai cyhoeddi mesur i reoleiddio'r diwydiant gael ei wrthod, gan nad yw hynny o fewn pŵer y cyngor.
Straeon perthnasol
- 11 Ionawr 2012