Mott: 'Patel oedd y gwahaniaeth'
- Published
image copyrightGetty ImagesMae hyfforddwr tîm criced Morgannwg, Matthew Mott wedi canmol bowliwr Swydd Nottingham Samit Patel, wedi buddugoliaeth Notts yn rownd derfynol cystadleuaeth YB40 yn Lord's ddydd Sadwrn.
Collodd Morgannwg o 87 rhediad wedi i fowlio Patel newid y gêm.
Llwyddodd i gymryd tair wiced am 21 rhediad, a helpu i sicrhau buddugoliaeth gyfforddus i'w dîm.
Dywedodd Mott nad oedd ei dîm wedi gallu delio hefo Patel.
"Pan ddaeth ymlaen roedd gennym ni rhythm, ond daeth (Patel) a hynny i ben a doedden ni methu a'i gael yn ôl," meddai Mott, sy'n gadael Morgannwg ar ddiwedd y tymor.
Penderfynodd Morgannwg i fowlio yn gyntaf a 244 am 8 wiced oedd sgôr terfynol Swydd Nottingham ar ddiwedd y 40 pelawd.
Llwyddodd Samit Patel a bowlwyr Swydd Notts i gymryd wicedi cynnar, a doedd batwyr Morgannwg methu a chystadlu.
157 oedd eu cyfanswm, ac roedd hi'n fuddugoliaeth gyfforddus i Notts yn y diwedd.
Cyfle 'allweddol'
Dywedodd Mott hefyd bod Morgannwg wedi methu cyfle allweddol pan fethodd Gareth Rees dal David Hussey, a bod hynny wedi bod yn drobwynt yn y gêm.
"Mae'r pethau yma yn digwydd mewn ffeinals," meddai.
"Doedd o ddim yn gyfle hawdd, ond byddai'n disgwyl ei chymryd fel arfer ac yn y diwedd roedd hi'n allweddol.
image copyrightHuw Evans picture agency"O'r pwynt yna ymlaen llwyddodd Notts i adeiladu yn gryf, ac roedd Hussey yn edrych yn beryglus iawn."
Llwyddodd Jim Allenby a Chris Cooke i roi ychydig o obaith i'r Cymry gan sgorio 66 rhediad, ond dywedodd Mott mai bowlio Patel oedd wedi ennill y gêm I Notts.
"Chwaraeodd Allenby a Cooke yn arbennig o dda," meddai Mott.
"Ond cawson nhw eu bowlio gan Patel a dyna oedd y gwahaniaeth yn y diwedd.
"Dyna oedd y bartneriaeth fyddai wedi ennill y gêm i ni ond yn anffodus doedden ni methu a manteisio."
Bydd Matthew Mott yn gadael Morgannwg ar ddiwedd y tymor wedi tair blynedd fel hyfforddwr.
Mae Mott wedi penderfynu dychwelyd i Awstralia.
Straeon perthnasol
- Published
- 21 Medi 2013
- Published
- 20 Awst 2013