Gwahardd pennath recriwtio Clwb Pêl-droed Caerdydd

Daeth Iain Moody gyda Malky Mackay pan symudodd yr Albanwr o Watford i Gaerdydd

Mae Clwb Pêl-droed Caerdydd wedi gwahardd eu pennaeth recriwitio, Iain Moody a phenodi Alisher Apsalyamov o Kazakhstan i'r swydd yn ei le.

Roedd Moody yn rhan o dîm Malky Mackay yn Watford, lle bu'n swyddog y wasg cyn symud gyda'r Albanwr i Gaerdydd yn 2011.

Yn ei swydd recriwtio gyda'r Adar Gleision, mae Moody wedi helpu i ddenu chwaraewyr fel Gary Medel a Steven Caulker i'r clwb.

Mae Clwb Pêl-droed Caerdydd wedi gwrthod gwneud sylw.

Pennaeth Recriwtio

Mae gwefan y clwb yn dweud bod Moody wedi dechrau ei yrfa fel cyfieithydd i'r Eidal yn ystod Pencampwriaeth Ewropeaidd 1996.

Aeth ymlaen i weithio ar wefan pêl-droed Football365.com yn 1999, cyn symud i asiantaeth rheolaeth chwaraeon yn 2001.

Ddeng mlynedd yn ddiweddarach ymunodd a Watford fel swyddog y wasg cyn dod yn rheolwr gweithrediadau pêl-droed i Malky Mackay.

Pan symudodd Mackay i Gaerdydd, aeth a Moody gydag ef i fod yn bennaeth recriwtio.

Nid yw'r rheswm dros waharddiad Moody yn glir ar hyn o bryd.

'Pryder'

Dywedodd gohebydd pêl-droed BBC Cymru, Rob Phillips: "Mae Iain Moody wedi bod yn ddylanwad arwyddocaol iawn yng Nghaerdydd.

"Mae Malky Mackay yn gwbl ffyddiog yn Moody, a ddaeth gydag ef o Watford.

"Ef yw'r dyn mae Mackay wedi ymddiried ynddo i ddelio gyda throsglwyddiadau, gan gynnwys dau chwaraewr pwysig; Steven Caulker o Spurs, a Gary Medel o Sevilla.

"Y pryder i gefnogwyr Caerdydd yw a fydd hyn yn ansefydlogi Mackay wedi dechrau da i'r tymor. Mae Mackay wedi hyrwyddo tegwch o fewn y tîm a bydd y rhain yn ddatblygiadau pryderus."

Roedd Moody hefyd yn rhan o'r ymgyrch llwyddiannus i arwyddo Kevin Theophile-Catherine ac Andreas Cornelius dros yr haf, a Fraizer Campbell, Jordon Mutch a Kim Bo-Kyung cyn hynny.