BBC Cymru Fyw

Llywodraeth Cymru'n cyrraedd targed

Published

Mae Llywodraeth Cymru wedi llwyddo i gyrraedd un o'i dargedau dwy flwyddyn fewn i'r tymor Cynulliad pum mlynedd.

Cyhoeddodd y Gweinidog Llywodraeth Leol Lesley Griffiths bod 500 o swyddogion cymorth cymunedol wedi cael eu penodi ers 2011.

Dywedodd Ms Griffiths: "Rwy'n falch o gyhoeddi bod Llywodraeth Cymru, drwy weithio gyda'r pedwar llu heddlu Cymreig a'r Heddlu Trafnidiaeth Prydeinig wedi llwyddo i gyrraedd y targed o recriwtio 500 swyddog cymorth cymunedol ychwanegol.

"Mae hyn yn newyddion gwych i gymunedau Cymreig ac rwy'n credu bod y buddiannau yn cael eu gweld yn barod.

"Mae'r swyddogion hyn yn chwarae rhan bwysig iawn yn cefnogi'r heddlu gan wneud i bobl deimlo fwy diogel yn y gymuned."

Mae Llywodraeth Cymru wedi bod o dan y lach yn ddiweddar am fethu llawer o targedau ym maes iechyd, ac mae'r Prif Weinidog Carwyn Jones wedi cyhoeddi ei fod yn ystyried newid rhai ohonyn nhw.