Cleverly yn dychwelyd yn drymach

Collodd Nathan Cleverly yn y bedwaredd rownd i Sergey Kovalev

Mae'r bocsiwr Nathan Cleverly wedi cyhoeddi y bydd yn newid ei bwysau wrth ddychwelyd i'r sgwâr ddiwedd mis Tachwedd.

Collodd Cleverly ei deitl fel pencampwr is-drwm y byd yn erbyn Sergey Kovalev ym mis Awst.

Bydd yn dychwelyd fel bocsiwr gordrwm (cruiserweight) wrth iddo wynebu Daniel Ammann ar gyfer pencampwriaeth y Gymanwlad ar Dachwedd 30.

Bu sibrydion y byddai Cleverly yn ymddeol o'r gamp yn llwyr ar ôl colli i Kovalev, ond dywedodd:

"Rwy'n barod i ddychwelyd a fedra i ddim disgwyl tan Dachwedd 30 i ddangos bod Nathan Cleverly yn ei ôl.

"Mae gen i'r awch unwaith eto ac rwyf am fod yn bencampwr byd eto.

"Dydw i ddim am adael fy nghefnogwyr i lawr - y rhai sydd wedi fy nghefnogi gydol fy ngyrfa - gadael fy nheulu i lawr ac yn bwysicach gadael fy hun i lawr drwy orffen ar ôl colli.

"Mae meddwl am ennill ail bencampwriaeth byd yn fy nghyffroi."

Mae Ammann wedi ennill 29 o'i 35 gornest broffesiynol ac ef yw pencampwr Awstralia.