Swydd newydd i Iain Moody

Cyhoeddwyd
Ffynhonnell y llun, Getty Images
Disgrifiad o’r llun,
Cafodd Moody ei ddiswyddo ym mis Hydref gan Vincent Tan

Mae cyn Bennaeth Recriwtio Clwb Pêl-Droed Caerdydd wedi ymuno â Crystal Palace fel Cyfarwyddwr Chwaraeon.

Collodd Iain Moody ei swydd yn Stadiwm y Ddinas Caerdydd wedi i'r perchennog benodi gŵr 23 oed o Kazakhstan, Alisher Apsalyamov yn ei le.

Roedd Moody wedi bod yn aelod o dîm rheoli Malky Mackay yn Watford cyn yr Adar Gleision, ac mae cyd-gadeirydd Palace, Steve Parish yn credu iddo gael y dyn cywir am y swydd.

Bydd Moody yn rhan o'r broses o ddewis rheolwr newydd i'r clwb o Lundain, swydd y mae rheolwr Cymru Chris Coleman wedi ei gysylltu gydag ef.

Ffynhonnell y llun, Getty Images
Disgrifiad o’r llun,
Mae ansicrwydd am ddyfodol Coleman fel rheolwr Cymru

Coleman ar ei ffordd?

Dywedodd Steve Parish: "Rydym yn hapus iawn hefo Iain Moody. Wnes i gwrdd ag o ac fe wnaeth o argraff dda iawn."

"Mae recriwtio chwaraewyr yn hanfodol i glwb pêl-droed. Bydd yn gweithio yn agos gyda fi a'r rheolwr newydd pan fydd yn cael ei benodi.

"Mae Iain yn rhywun fydd yn cael ei holi fel rhan o ddewis rheolwr.

"Rydym eisiau penodi rhywun yn sydyn ond rhaid cael y person cywir."

Mae rheolwr Cymru, Chris Coleman wedi cael ei gysylltu â'r swydd sawl gwaith.

Chwaraeodd Coleman i Palace rhwng 1991 a 1995, gan chwarae dros 150 o gemau, ond y gred yw ei fod mewn trafodaethau i ymestyn ei gytundeb gyda Chymru.

Straeon perthnasol