Cymru 24 - 28 Ynysoedd Cook

Colli am y trydydd tro wnaeth Cymru ddydd Sul

Daeth Cwpan Rygbi 13 y Byd Cymru i ben gyda thrydydd colled yn erbyn yr Ynysoedd Cook ddydd Sul.

Wedi perfformiadau gwael hyd yn hyn yn y grŵp, rhoddodd y Cymry mwy o wrthwynebiad i'r tim o'r môr Tawel, ond 24 - 28 oedd y sgôr terfynol.

Dyma oedd buddugoliaeth gyntaf yr Ynysoedd yng Nghwpan y Byd, a hynny yn eu chweched gêm yn y gystadleuaeth.

Wedi iddyn nhw fod ar y blaen o 22 - 4 ar yr egwyl, roedd rhaid i'r Ynysoedd weithio yn galed i gadw'r Cymry allan tua diwedd y gêm.

Daeth ceisiau i'r Ynysoedd gan Keith Lulia, Isaac John, Daniel Fepuleai, Dominique Peyroux a Jonathon Ford, a chiciodd Chris Taripo pedwar gol.

Roedd hi'n dasg anodd i Gymru i ddod yn ôl wedi'r grasfa yn yr hanner cyntaf, ond daeth ceisiau gan Lloyd White, dwy gan Christiaan Roets ac un gan Rhodri Lloyd i roi gobaith i'r cochion.

Cafodd Cymru gyfleoedd, ond nid oedd digon o amser i fanteisio.

Mae'r golled yn golygu bod Cymru yn gorffen ar waelod y grŵp, wedi iddyn nhw golli i'r Eidal a'r Unol Daleithiau hefyd.

Cymru 24 - 28 Ynysoedd Cook