BBC Cymru Fyw

April: Euog o sylwadau sarhaus

Published
image copyrightApril Jones's parents
image captionCafodd April Jones ei chipio wrth chwarae ger ei chartref ym Machynlleth

Mae dyn wnaeth sylwadau sarhaus am April Jones ar y we ac yna ffoi o afael yr awdurdodau wedi ymddangos yn y llys.

Fe wnaeth Gordon Mullen, 24 oed, o Salcoats yn Ayrshire wneud y sylwadau ar wefan Facebook ar ôl i'r ferch bump oed fynd ar goll ym mis Hydref y llynedd.

Roedd yr heddlu wedi bod yn chwilio am Mullen am bedwar mis.

Yn Llys y Siryf yn Kilmarnock fe wnaeth bledio'n euog i dorri'r Ddeddf Gyfathrebu.

Cafodd ei ryddhau ar fechnïaeth a bydd yn cael ei ddedfrydu fis nesa'.

Fe aeth April ar goll o'i chartref ym Machynlleth ar 1 Hydref 2012. Dyw'r awdurdodau heb ddod o hyd i'w chorff.

Fis diwethaf fe wnaeth Liam Young, 25 o Ardrossan, oedd yn wynebu cyhuddiadau ar y cyd gyda Mullen gael ei ddedfrydu i wneud 120 awr o waith di-dâl.

Roedd o wedi pledio'n euog i anfon sylwadau sarhaus ac anweddus am April.

Bu'r ddau ddyn mewn sgwrs gydag un person arall ar Facebook.

Clywodd y llys fod Mullen ac Ardossan wedi cystadlu gyda'i gilydd wrth wneud sylwadau sarhaus.

Ym mis Mai, cafodd Mark Bridger ei garcharu am oes yn Llys y Goron yr Wyddgrug o lofruddio a chipio April.

Straeon perthnasol

  • Dedfrydu dyn yn yr Alban oherwydd sylwadau am April