Rali GB Cymru: Ogier yn feistrolgar

Mae gan Sebastien Ogier fantias o dros 13 eiliad bellach

Mae Sebastien Ogier wedi ymestyn ei fantais ar flaen Rali GB Cymru yn dilyn y cymalau arbennig fore Gwener.

Daeth dechreuad dramatig i'r bore wrth i'r cyn rasiwr Fformiwla 1, Robert Kubica, droi ei gar Citroen ben i waered ar gymal cynta'r bore yn Hafren.

Roedd Ogier a'r ceffylau blaen eraill wedi hen basio, ac roedd y gyrwyr eraill yn cyfadde' bod Volkswagen y Ffrancwr yn rhy gyflym.

Erbyn yr egwyl ginio roedd Ogier wedi agor bwlch o 13.5 eiliad rhyngddo a Jari-Matti Latvala yn yr ail safle.

Cafodd Thierry Neuville fore gwael gan ddisgyn o'r ail i'r trydydd safle, ac mae o bellach dros hanner munud y tu ôl i Ogier.

Oherwydd y ddamwain, mae trefnwyr y rali yn aros i wirio rhai o amseroedd y gyrwyr oedd y tu ôl i Kubica gan gynnwys Elfyn Evans.

Ond maen nhw wedi cadarnhau bod Evans yn cystadlu i fod ar frig Categori 2, ac yn debyg o fod yn y deg uchaf yn y ras gyfan.

RALI GB CYMRU - Safleoedd ar ddiwedd Cymal Arbennig 6 :-

1. Sebastien OGIER - 54'25.8"

2. Jari-Matti LATVALA - +13.5"

3. Thierry NEUVILLE - +35.4"

4. Mads OSTBERG - +57.4"

5. Evgeny NOVIKOV - +1'07.6"